વડોદરાના ગોરવામાં દીકરીની જેમ ઘરમાં રાખેલી યુવતી પર સોના-ચાંદીના દાગીના ચોરી કરવાનો આરોપ લાગ્યો છે. તિજોરીમાંથી રૂ. 5.15 લાખના દાગીના ગુમ થતાં પરિવારને શંકા ગઈ અને પોલીસે સમગ્ર મામલે તપાસ શરૂ કરી છે.

Vadodara Theft Case : વડોદરાના ગોરવામાં ITI ચાર રસ્તા પાસે શિવમ ફ્લેટમાં રહેતા મીરાબેન રામઆશરે સિંગ ઘર કામ કરે છે. અને તેમના પતિ ગોરવા શાક માર્કેટમાં શાકભાજીનો વેપાર કરે છે. ગોરવા પોલીસ સ્ટેશનમાં તેમને ફરિયાદ નોંધાવી જણાવ્યું છે કે તારીખ 4-1-2024 ના રોજ અમે તથા મારી દીકરી અને સમગ્ર પરિવાર શિરડી દર્શન કરવા માટે ગયા હતા અને દર્શન કરીને પરત આવતા હતા. તે દરમિયાન સાપુતારા ઘાટ પાસે એક્સિડન્ટ હતા મારી દીકરી, જમાઈ, પૌત્રી તેમજ મારા સાસુના કરુણ મૃત્યુ નિપજ્યાં હતા. મારી દીકરીના સાસરીયાએ દીકરીના દાગીના જેવા કે માંગ ટીકા, સોનાનો હાર, બુટ્ટી, પેન્ડલ, ચેન, મંગળસૂત્ર, ઝુમકા વગેરે કુલ વજન 101 ગ્રામના દાગીના તથા ચાંદીના દાગીના મળી કુલ 5.15 લાખના દાગીના પરત આપ્યા હતા.
મારા પતિના ભાઈ છોટેલાલ સિંગ જેઓ ઉદય ભાનપુર રહે છે. તેમની દીકરી શ્રેયા અવારનવાર અમારા ઘરે આવતી જતી હતી. વર્ષ 2025 માં અમારા ઘરે રહેવા માટે આવી હતી અને અમે તેને દીકરીની જેમ રાખતા હતા. તા.16-6-2026 ના રોજ હું તથા શ્રેયા મકાનની સફાઈ કરતા હતા. તે વખતે તિજોરીમાં મુકેલા અમારા દાગીના તે જોઈ ગઈ હતી. ત્યારબાદ 8 જુલાઈએ શ્રેયા મારું મકાન છોડી હતી એની મરજીથી લક્ષ્મીપુરા સૌરભ પાર્ક સોસાયટીમાં રહેવા માટે જતી રહી હતી. ત્યારબાદ તે અવાર નવાર અમારા ઘરે આવતી હતી 26-8-2026 ના રોજ વતન ખાતે જવાનું હોય જેથી કબાટની તિજોરીમાં મુકેલા દાગીના લેવા જતા દાગીના જણાઈ આવ્યા ન હતા. અમારા ઓળખીતા સોની પિયુષ જવેલર્સની ત્યાં હું અને શ્રેયા દાગીના લેવા માટે જતા હતા. જેથી તેઓની દુકાને જઈ તપાસ કરતા તેઓએ અમને કહ્યું હતું કે વીસ દિવસ પહેલા તમારી સાથે આવતી શ્રેયા દાગીના વેચવા માટે આવી હતી પરંતુ અમે લીધા નથી શ્રેયાને ફોન કરતા દાગીના તેને લીધા હોવાનો જણાવ્યું હતું.