ચૂંટણી પંચમાં સ્પેશિયલ ઇન્ટેન્સિવ રિવિઝન (SIR) અને મતદાર યાદી સુધારણામાં ગરબડના આરોપો વચ્ચે મુખ્ય ચૂંટણી કમિશનર (CEC) જ્ઞાનેશ કુમારની મુશ્કેલીઓમાં મોટો વધારો થયો છે. આ સમગ્ર વિવાદ હવે સુપ્રીમ કોર્ટમાં પહોંચ્યો છે, જ્યાં દાખલ કરાયેલી અરજીમાં SIR પ્રક્રિયા દરમિયાન લેવાયેલા તમામ વિવાદાસ્પદ નિર્ણયોને રદ્દ કરવાની અને મતદાર યાદીમાંથી ગેરકાયદે રીતે હટાવાયેલા નામોને પુનઃસ્થાપિત કરવાની માંગ કરવામાં આવી છે. સાથી કમિશનરોની ૧૪ વખતની લેખિત આપત્તિઓ જાહેર થયા બાદ વિપક્ષી પક્ષો અને નાગરિક સંસ્થાઓએ જ્ઞાનેશ કુમારના રાજીનામાની માંગ સાથે કાનૂની લડાઈ તેજ બનાવી છે.

CEC Gyanesh Kumar Controversy: મુખ્ય ચૂંટણી કમિશનર જ્ઞાનેશ કુમાર સામે સુપ્રીમ કોર્ટમાં અરજી દાખલ કરવામાં આવી છે. જેમાં સ્પેશિયલ ઇન્ટેન્સિવ રિવિઝન (SIR)માં ગરબડ કરવાનો આક્ષેપ કરવામાં આવ્યો છે. આ અરજી અંગ્રેજી અખબાર ‘ધ ઇન્ડિયન એક્સપ્રેસ’માં પબ્લિશ થયેલા રિપોર્ટના કેટલાક દિવસો બાદ કરવામાં આવી છે. જેમાં ચૂંટણી કમિશનર સુખબીર સિંહ સંધૂ અને વિવેક જોશીએ SIR સાથે જોડાયેલા નિર્ણયો અને આદેશ અંગે ઓછામાં ઓછી 14 વાર વાંધો દર્શાવ્યો હોવાનો ઉલ્લેખ કરવામાં આવ્યો હતો.

સુપ્રીમ કોર્ટમાં કરાયેલી અરજીમાં ઇન્ડિયન એક્સપ્રેસના રિપોર્ટનો સંદર્ભ ટાંકીને બે ચૂંટણી કમિશનરની સહમતિ વગર લેવાયેલા નિર્ણયો અને આદેશોને ગેરકાયદેસર જાહેર કરવાની માગ કરવામાં આવી છે.

અરજીમાં SIT તપાસની માગ

બંધારણની કલમ 32 અંતર્ગત વકીલ શૈલેન્દ્ર મણિ ત્રિપાઠીએ સુપ્રીમ કોર્ટમાં આ અરજી દાખલ કરી છે. અરજીકર્તાની માગ છે કે, આ મામલે SIT તપાસ કરાવવામાં આવે કે, મતદાતા યાદીમાંથી 13 કરોડ મતદાતાના નામ કેવી રીતે હટાવવામાં આવ્યા.

'મનીષ સિસોદિયા પર કોઈ આરોપ નથી લગાવ્યાં..' કોર્ટમાં CBIના દાવા સામે કેજરીવાલનો ઘટસ્ફોટ

રિપોર્ટમાં ચૂંટણી કમિશનરની સહમતિ વગર લેવાયેલા નિર્ણયો અંગે સવાલ કરવામાં આવ્યા છે. આ નિર્ણયોમાં ‘ફોર્મ 6’માં બદલાવ અને ચૂંટણી યાદીના ડેટાના સંચાલન સાથે જોડાયેલા મુદ્દાઓનો સમાવેશ થાય છે. રિપોર્ટમાં કહેવાયું છે કે, જે નિર્ણયો તેમની જાણકારી વગર કે તેમની ભલામણની વિરુદ્ધ થઈને લેવામાં આવ્યા છે, તેની સામે વાંધો છે.

જવાબદાર અધિકારીઓ સામે કાર્યવાહીની માગ

અરજીમાં આ રિપોર્ટના આધારે RP એક્ટ અંતર્ગત જ્ઞાનેશ કુમાર પર કેસ ચલાવવાની માગ કરી છે. અરજીકર્તાએ વિશેષ રૂપે સક્ષમ અદિકારીને નિર્દેશ આપવાની પણ માગ કરી છે કે, તેઓ ‘રિપ્રેઝેન્ટેશન ઓફ પીપલ એક્ટ, 1950’ની કલમ 32 અંતર્ગત ફરિયાદ દાખલ કરે અને કેસ ચલાવે. અરજીમાં જ્ઞાનેશ કુમાર, સિનિયર ડેપ્યૂટી ચૂંટણી કમિશનર મનીષ ગર્ગ, ડાયરેક્ટ જનરલ (IT) સીમા ખન્ના અને ફરજભંગ કરનારા તમામ જવાબદાર અધિકારીઓ સામે કાર્યવાહી કરવાની માગ કરવામાં આવી છે.