નાસાના પાર્કર સોલાર પ્રોબે સૂર્યના શક્તિશાળી વિસ્ફોટો અને રહસ્યમય ઊર્જા પ્રવાહોના નવા રહસ્યો ઉકેલ્યા, વૈજ્ઞાનિકોને સૌર પવનો અને અવકાશી હવામાનને સમજવામાં મળી મહત્વપૂર્ણ સફળતા

બોલિવુડ સુપરસ્ટાર રણબીર કપૂર અને સાઉથની લોકપ્રિય અભિનેત્રી સાઈ પલ્લવીની બહુચર્ચિત ફિલ્મ ‘રામાયણ’ને લઈને ચાહકોમાં ભારે ઉત્સાહ જોવા મળી રહ્યો છે. આ ફિલ્મ આ વર્ષની દિવાળી પર સિનેમાઘરોમાં રિલીઝ થવાની છે અને તેને વર્ષ 2026ની સૌથી મોટી અને મોસ્ટ અવેટેડ ફિલ્મોમાંની એક માનવામાં આવી રહી છે. હવે ફિલ્મના ટ્રેલરને લઈને પણ મહત્વની માહિતી સામે આવી છે. ફિલ્મનું ટીઝર પહેલાથી જ રિલીઝ થઈ ચૂક્યું છે, જેને દર્શકો તરફથી સારો પ્રતિસાદ મળ્યો હતો. ત્યારથી જ ચાહકો ઓફિશિયલ ટ્રેલરની આતુરતાથી રાહ જોઈ રહ્યા હતા. હવે મીડિયા અહેવાલો અનુસાર, ફિલ્મનું ભવ્ય ટ્રેલર આગામી 10 દિવસમાં, એટલે કે 18 જુલાઈ આસપાસ રિલીઝ થઈ શકે છે. જો આવું થશે તો ફિલ્મ રિલીઝના લગભગ સાડા ત્રણ મહિના પહેલા જ તેનું ટ્રેલર દર્શકો સામે આવી જશે.

સામાન્ય રીતે કોરોના મહામારી બાદ ફિલ્મોના ટ્રેલર રિલીઝ કરવાની રીતમાં ફેરફાર આવ્યો છે. મોટા ભાગની ફિલ્મોના ટ્રેલર ફિલ્મ રિલીઝના થોડા અઠવાડિયા પહેલા જ લોન્ચ કરવામાં આવે છે. પરંતુ ‘રામાયણ’ના નિર્માતાઓએ આ ટ્રેન્ડથી અલગ જઈને વહેલું પ્રમોશન શરૂ કરવાનો નિર્ણય લીધો છે. ફિલ્મ સાથે જોડાયેલા સૂત્રોના જણાવ્યા મુજબ, ‘રામાયણ’ને માત્ર ભારતીય ફિલ્મ તરીકે નહીં પરંતુ વૈશ્વિક સ્તરે રજૂ કરવાની તૈયારી ચાલી રહી છે. નિર્માતાઓનું માનવું છે કે આ ફિલ્મની વાર્તા અને વિષય વિશ્વભરના દર્શકોને આકર્ષી શકે છે. તેથી આંતરરાષ્ટ્રીય સ્તરે ફિલ્મને વધુ સારી ઓળખ મળે તે માટે વહેલા તબક્કેથી પ્રમોશન શરૂ કરવામાં આવી રહ્યું છે. આ ફિલ્મનું નિર્દેશન જાણીતા ફિલ્મમેકર નીતિશ તિવારી કરી રહ્યા છે. તેઓ અગાઉ ‘દંગલ’ જેવી સુપરહિટ ફિલ્મ આપી ચૂક્યા છે. આ વખતે તેઓ પહેલીવાર એટલા મોટા સ્તરે VFX અને CGI ટેક્નોલોજીનો ઉપયોગ કરીને પૌરાણિક કથાને ભવ્ય સ્વરૂપમાં રજૂ કરી રહ્યા છે.

ફિલ્મમાં રણબીર કપૂર ભગવાન શ્રીરામના પાત્રમાં જોવા મળશે, જ્યારે સાઈ પલ્લવી માતા સીતાની ભૂમિકા ભજવી રહી છે. ફિલ્મમાં સુપરસ્ટાર યશ અને સની દેઓલ સહિત અનેક જાણીતા કલાકારો પણ મહત્વપૂર્ણ પાત્રોમાં જોવા મળશે. આ સ્ટારકાસ્ટને કારણે ફિલ્મ પ્રત્યે દર્શકોની ઉત્સુકતા સતત વધી રહી છે. ફિલ્મને લઈને વધુ એક રસપ્રદ માહિતી પણ સામે આવી છે. અહેવાલો મુજબ, શરૂઆતમાં રિલીઝ કરાયેલા ટીઝરમાં મેકર્સે જાણીજોઈને મર્યાદિત VFX દર્શાવ્યા હતા. સોશિયલ મીડિયા પર ચાલતી ચર્ચાઓ અને દર્શકોની પ્રતિક્રિયાને ધ્યાનમાં રાખીને ટ્રેલર અને આખી ફિલ્મમાં વધુ અદ્યતન અને ભવ્ય વિઝ્યુઅલ ઇફેક્ટ્સ રજૂ કરવામાં આવશે. નિર્માતાઓને વિશ્વાસ છે કે થિયેટરમાં ફિલ્મ જોયા બાદ દર્શકોને એક અલગ જ અનુભવ મળશે.