ફ્રાન્સમાં વધતી મોંઘવારી અને વિવાદાસ્પદ સ્કૂલ સિસ્ટમ સામે નાગરિકોમાં ભારે જનઆક્રોશ ફાટી નીકળ્યો છે. દેશભરમાં વ્યાપક વિરોધ પ્રદર્શનોને પગલે ૭૦,૦૦૦ જેટલી વિશાળ પોલીસ ફોર્સ તહેનાત કરવામાં આવી છે, જેના કારણે આગામી ચૂંટણી પૂર્વે રાષ્ટ્રપતિ મેક્રોન સરકાર ભારે રાજકીય સંકટમાં મુકાઈ ગઈ છે.

France Protests: ફ્રાન્સમાં શાળાના વિદ્યાર્થીઓ દ્વારા શિક્ષણની સ્થિતિને લઈને શરૂ થયેલું આંદોલન હવે સમગ્ર દેશમાં ફેલાઈ ગયું છે. મોંઘવારી અને જીવનનિર્વાહના વધતા ખર્ચથી પીડાતી જનતાનો આક્રોશ પણ આ પ્રદર્શનોમાં ભળી ગયો છે. ગયા અઠવાડિયે હિંસક ઝડપો બાદ આજે ફરી મોટાપાયે વિરોધ પ્રદર્શનો યોજાવાની શક્યતા છે. પરિસ્થિતિને વણસતી અટકાવવા અને કાયદો-વ્યવસ્થા જાળવવા માટે સરકારે દેશભરમાં આશરે 70,000 સુરક્ષાકર્મીઓને તૈનાત કર્યા છે. ગૃહમંત્રી લોરેન્ટ નુનેઝે ચેતવણી આપી છે કે સોશિયલ મીડિયા પર હિંસા અને લૂંટફાટ ઉશ્કેરવાના સંદેશાઓ વાઇરલ થઈ રહ્યા છે.

હિંસા આચરનારાઓ સામે કડક કાર્યવાહી: 217 લોકોને જેલ ભેગા કરાયા

પ્રમુખ ઇમેન્યુઅલ મેક્રોને ગુરુવારે ઉગ્ર-ડાબેરી જૂથો પર 'રિપબ્લિકને તોડી પાડવાનો' પ્રયાસ કરવાનો આરોપ લગાવ્યો હતો અને ગુનાહિત પ્રવૃત્તિઓ સામે સખતમાં સખત કાર્યવાહી કરવાનો આદેશ આપ્યો છે. ન્યાય મંત્રી ગેરાર્ડ દારમાનિને જણાવ્યું કે ગયા શનિવારે થયેલી લૂંટફાટ અને તોડફોડના મામલે કોર્ટે અત્યાર સુધીમાં 217 લોકોને જેલમાં મોકલી દીધા છે. બીજી તરફ, મેક્રોને શુક્રવારે માધ્યમિક શાળાના વિદ્યાર્થીઓના પ્રતિનિધિઓ સાથે બેઠક કરી હતી, પરંતુ વિદ્યાર્થીઓએ માંગણીઓનો ઉકેલ ન આવે ત્યાં સુધી પ્રદર્શનો ચાલુ રાખવાની હાકલ કરી છે.

પેરિસ, લિયોન અને માર્સેલી સહિતના શહેરોમાં પ્રદર્શનો પર પ્રતિબંધો

સ્થિતિને ધ્યાનમાં રાખીને વહીવટીતંત્રે પેરિસ, લિયોન અને ઓર્લિયન્સ જેવા મુખ્ય શહેરોના મધ્ય ભાગોમાં પ્રદર્શનો કરવા પર પ્રતિબંધ મૂકી દીધો છે. ઓર્લિયન્સમાં જમણેરી નેતા મરીન લે પેનની પાર્ટીના સંમેલન સામે વિરોધ પ્રદર્શન યોજાવાની શક્યતા છે. વધતી સુરક્ષા ચિંતાઓને કારણે પેરિસમાં વિશ્વપ્રસિદ્ધ 'લૂવ્ર મ્યુઝિયમ' સહિતના સ્થળો શનિવારે બંધ રાખવામાં આવ્યા છે. જોકે, એમનેસટી ઇન્ટરનેશનલ અને હ્યુમન રાઇટ્સ વોચ જેવી સંસ્થાઓએ વિરોધ પ્રદર્શન પર મૂકાયેલા પ્રતિબંધો અને શાંતિપૂર્ણ આંદોલનકર્તાઓ પર પોલીસ કાર્યવાહીની ટીકા કરી છે.

પ્રમુખપદની ચૂંટણી પહેલા વધ્યો રાજકીય ગરમાવો: મરીન લે પેન રેસમાં આગળ

આ હિંસા અને અશાંતિ વચ્ચે ફ્રાન્સમાં આગામી પ્રમુખ ચૂંટણી પહેલા રાજકીય ગરમાવો વધી ગયો છે. તાજેતરના પોલ અનુસાર, આ વિવાદો વચ્ચે ફાર-રાઈટ (સુદૂર દક્ષિણપંથી) નેતા મરીન લે પેનની લોકપ્રિયતામાં મોટો ઉછાળો આવ્યો છે અને તેઓ પ્રમુખપદની રેસમાં સૌથી આગળ ચાલી રહ્યા છે. ઓપિનિયન પોલમાં દાવો કરાયો છે કે ચૂંટણીના પ્રથમ તબક્કામાં મરીન લે પેન 33થી 35 ટકા મતો સાથે આગળ રહી શકે છે અને બીજા તબક્કામાં તેઓ સરળતાથી જીત મેળવી શકે છે.