અમદાવાદના ગીતામંદિર બસ સ્ટેન્ડ બહાર મુસાફરોને ધમકાવીને લૂંટ ચલાવતી ગેંગનો વીડિયો સોશિયલ મીડિયા પર વાઈરલ થયો છે. બસ સ્ટેન્ડ નજીક અસામાજિક તત્વો મુસાફરોના ખિસ્સા ખંખેરી રોકડ અને સામાન પડાવી લેતા હોવાની ઘટના સામે આવતા પોલીસ તંત્ર દોડતું થયું છે.

Ahmedabad Geetamandir Bus Stand Robbery: અમદાવાદના ગીતામંદિર સેન્ટ્રલ એસ.ટી. બસ સ્ટેન્ડ નજીક રસ્તા પરથી પસાર થતાં મુસાફરો અને રાહદારીઓને રોકીને ડરાવી-ધમકાવી લૂંટ ચલાવતી એક ટોળકીનો વીડિયો સોશિયલ મીડિયામાં વાયરલ થતાં ચકચાર મચી છે. આ દરમિયાન એક જાગૃત મુસાફરે સમગ્ર ઘટના મોબાઇલમાં કેદ કરી વાયરલ કરતાં ઝોન-6 પોલીસે સક્રિય થઈ એક શખ્સની ઓળખ કરી કાયદેસરનો ગુનો નોંધવાની તજવીજ હાથ ધરી છે.

મુસાફરોને રોકી ખિસ્સામાંથી સામાન પડાવતા હતો

મળતી માહિતી અનુસાર, ​ગીતામંદિર બસ સ્ટેન્ડ ખાતે રોજના હજારો-લાખો મુસાફરો અવરજવર કરે છે. આ ભીડભાડવાળા વિસ્તારની બહાર એક સગીર સહિત ચાર જેટલા અસામાજિક તત્ત્વો રસ્તા પરથી પસાર થતાં લોકોને બળજબરીથી રોકી, ધમકી આપીને તેમનાં ખિસ્સાં તપાસી રોકડ તથા સામાન લૂંટી રહ્યા હોવાનું સામે આવ્યું છે. આ લુખ્ખાગીરી દરમિયાન ત્યાંથી પસાર થતી બસમાં બેઠેલા એક મુસાફરે છૂપી રીતે વીડિયો બનાવી લીધો હતો.

આ સમગ્ર મામલો સામે આવતાં ઝોન 6 ડીસીપી ભગીરથસિંહ ગઢવીએ જણાવ્યું હતું કે, 'ધ્યાને આવેલા વીડિયોમાં કેટલાક શખ્સો રાહદારીઓને રોકીને તપાસતા દેખાય છે. વીડિયોના આધારે એક યુવકની ઓળખ થઈ ગઈ છે. આ વીડિયો કઈ તારીખ અને સમયનો છે તેની ખરાઈ કરીને આગળની કડક કાયદેસરની કાર્યવાહી કરવામાં આવી રહી છે.'