સુરતમાં ભારે વરસાદ અને પૂર જેવી સ્થિતિ વચ્ચે રાહત-બચાવ કામગીરી માટે ભારતીય સેનાની 70 સભ્યોની એન્જિનિયર રેજિમેન્ટ ઉમરા પહોંચી, જ્યારે વડોદરાથી બે હાઈટેક બોટ સાથે વિશેષ ટીમ પણ તૈનાત કરવામાં આવી છે.

જો નીચાણવાળા અથવા પૂરગ્રસ્ત વિસ્તારોમાં લોકો ફસાઈ જાય તો તેમને સુરક્ષિત સ્થળે પહોંચાડવા, તાત્કાલિક મદદ પહોંચાડવા અને જરૂરિયાત મુજબ ઝડપી બચાવ કામગીરી હાથ ધરવા માટે આર્મીની ટીમની સેવાઓ લેવામાં આવશે. જિલ્લા વહીવટી તંત્રે જણાવ્યું છે કે ભારે વરસાદની પરિસ્થિતિને ધ્યાનમાં રાખીને તમામ જરૂરી તૈયારીઓ પૂર્ણ કરી દેવામાં આવી છે. NDRF, SDRF અને હવે ભારતીય સેનાની મદદથી કોઈપણ કટોકટીની સ્થિતિમાં ઝડપથી રાહત અને બચાવ કામગીરી હાથ ધરવામાં આવશે. તંત્ર દ્વારા સમગ્ર જિલ્લામાં વરસાદી સ્થિતિ પર સતત નજર રાખવામાં આવી રહી છે અને નાગરિકોને સાવચેત રહેવા તેમજ અધિકૃત સૂચનાઓનું પાલન કરવાની અપીલ કરવામાં આવી છે.