ગાંધીનગરના કુડાસણ વિસ્તારમાં બિલ્ડિંગનો સ્લેબ ધરાશાયી થતાં મોટી દુર્ઘટના સર્જાઈ હતી. આ કાટમાળમાં દટાયેલા તમામ 15 શ્રમિકોને આખી રાત ચાલેલી બચાવ કામગીરી બાદ સલામત રીતે બહાર કાઢીને સફળ રેસ્ક્યૂ કરવામાં આવ્યું છે.

ગાંધીનગરના કુડાસણ વિસ્તારમાં બુધવારે રાત્રે નિર્માણાધીન કોમર્શિયલ ઈમારતમાં મોટો અકસ્માત સર્જાયો હતો. બોસ્કી ધ એમ્પાયર નામના બાંધકામ સ્થળે સ્લેબ બનાવવાનું કામ ચાલી રહ્યું હતું ત્યારે અચાનક લોખંડનું માળખું અને સ્લેબનો એક ભાગ તૂટી પડ્યો હતો. શરૂઆતમાં અનેક કામદારો કાટમાળ નીચે ફસાયા હોવાની આશંકા વ્યક્ત કરવામાં આવી હતી. ત્યારબાદ બચાવ ટીમોએ 15 કામદારોને બહાર કાઢ્યા હતા.

વધુ શોધો

સુરત સમાચાર

ઈ-પેપર ઍક્સેસ

Geographic Reference

રાત્રે 9 વાગ્યાની આસપાસ બની ઘટના

મળતી માહિતી મુજબ, ઘટના રાત્રે આશરે 9 વાગ્યાની આસપાસ બની હતી. અહીં બે ઈમારતો વચ્ચે સ્લેબ બનાવવાનું કામ ચાલી રહ્યું હતું. આ દરમિયાન અચાનક માળખું ધરાશાયી થતાં કામ કરી રહેલા લોકો નીચે પટકાયા હતા અને કેટલાક કાટમાળમાં ફસાયા હતા. પ્રાથમિક તપાસમાં ક્રેનનો કોઈ ભાગ માળખા સાથે અથડાયો હોવાની શક્યતા પણ વ્યક્ત કરવામાં આવી છે. જોકે અકસ્માતનું ચોક્કસ કારણ હજુ તપાસનો વિષય છે.

ફાયર બ્રિગેડ અને પોલીસની ટીમો દોડી આવી

ઘટનાની જાણ થતાં ગાંધીનગર ફાયર એન્ડ ઈમરજન્સી સર્વિસ, પોલીસ અને અન્ય બચાવ ટીમો તાત્કાલિક સ્થળે પહોંચી ગઈ હતી. ફાયર બ્રિગેડની અનેક ગાડીઓ અને એમ્બ્યુલન્સની મદદથી બચાવ કામગીરી શરૂ કરવામાં આવી હતી. કાટમાળ ભારે હોવાથી તેને કાપીને અને હટાવીને કામદારો સુધી પહોંચવાની કામગીરી કરવામાં આવી હતી. સ્થાનિક લોકો પણ શરૂઆતમાં બચાવ કામગીરીમાં જોડાયા હતા.

15 કામદારોને બહાર કાઢવામાં આવ્યા

બચાવ કામગીરી દરમિયાન કુલ 15 કામદારોને સુરક્ષિત રીતે બહાર કાઢવામાં આવ્યા હોવાનું ડેપ્યુટી CM હર્ષ સંઘવીએ જણાવ્યું છે. જેમાંથી 12 કામદારોને સારવાર માટે હોસ્પિટલમાં દાખલ કરવામાં આવ્યા હતા, જ્યારે અન્ય કામદારોને ગંભીર ઈજા ન હોવાથી રજા આપવામાં આવી હતી. ગાંધીનગર સિવિલ હોસ્પિટલમાં પહોંચેલા ઈજાગ્રસ્ત કામદારોમાંથી કેટલાકને ઈજા થઈ હતી. હોસ્પિટલમાં તબીબોની ટીમને સારવાર માટે તૈયાર રાખવામાં આવી હતી. એક અહેવાલ મુજબ, બે દર્દીઓને કરોડરજ્જુમાં ઈજા થઈ હતી, પરંતુ કોઈની હાલત ગંભીર હોવાનું જણાવાયું નથી.

હર્ષ સંઘવી અને આરોગ્ય મંત્રી હોસ્પિટલ પહોંચ્યા

ઘટનાની ગંભીરતા જોતા રાજ્યના ગૃહ રાજ્યમંત્રી હર્ષ સંઘવી પણ ઘટનાસ્થળે પહોંચ્યા હતા અને બચાવ કામગીરીની માહિતી મેળવી હતી. આરોગ્ય મંત્રી પ્રફુલ પાનસેરિયાએ ગાંધીનગર સિવિલ હોસ્પિટલ પહોંચીને ઈજાગ્રસ્ત કામદારોની સ્થિતિ જાણી હતી અને સારવારમાં કોઈ અડચણ ન આવે તે માટે અધિકારીઓને સૂચના આપી હતી.

બાંધકામની સલામતી સામે ફરી સવાલ

કુડાસણમાં બનેલી આ ઘટનાએ નિર્માણાધીન ઈમારતોમાં કામદારોની સલામતીને લઈને ફરી સવાલ ઊભા કર્યા છે. સ્લેબ બનાવતી વખતે માળખું કેવી રીતે તૂટી પડ્યું અને બાંધકામ દરમિયાન જરૂરી સલામતીના નિયમોનું પાલન થયું હતું કે નહીં તેની તપાસ થવાની શક્યતા છે.

હાલમાં સૌથી મોટી રાહતની વાત એ છે કે ઘટનામાં ફસાયેલા તમામ 15 કામદારોને બચાવી લેવામાં આવ્યા છે. બચાવ ટીમોએ રાત્રિ દરમિયાન કાટમાળ હટાવવાની કામગીરી ચાલુ રાખી હતી, જેથી કોઈ વ્યક્તિ અંદર ફસાઈ ન રહી જાય તેની ખાતરી કરી શકાય.