Posted on 26 August 2026 | પ્રિયંકા ત્રિવેદી | નેશનલ, દિલ્હી
ICC MEN'S Test Bowling, Batting, All-Rounder Rankings 2026 : આંતરરાષ્ટ્રીય ક્રિકેટ પરિષદ (ICC) દ્વારા જાહેર કરવામાં આવેલી તાજેતરની ટેસ્ટ રેન્કિંગમાં મોટો ફેરફાર જોવા મળ્યો છે. ઓસ્ટ્રેલિયાના અનુભવી ફાસ્ટ બોલર મિચેલ સ્ટાર્કે શાનદાર પ્રદર્શન કરીને વિશ્વના નંબર-1 ટેસ્ટ બોલર બનવાનું ગૌરવ મેળવ્યું છે, જ્યારે ભારતીય ફાસ્ટ બોલર જસપ્રીત બુમરાહ હવે ટોચના સ્થાનેથી નીચે ખસી ગયો છે. બાંગ્લાદેશ સામેની ટેસ્ટ મેચમાં 10 વિકેટ લઈને સ્ટાર્કે કારકિર્દીમાં પહેલીવાર આ સ્થાન હાંસલ કર્યું છે.
સ્ટાર્કની ઐતિહાસિક સિદ્ધિ અને બુમરાહને નુકસાન
ઓસ્ટ્રેલિયાના મિચેલ સ્ટાર્ક (Mitchell Starc) પોતાના 15 વર્ષના લાંબા ટેસ્ટ કરિયરમાં ટોપ 10 બોલરોમાં સામેલ રહ્યા છે, પરંતુ ક્યારેય નંબર 1 બની શક્યા નહોતા. તાજેતરમાં 2 સ્થાનની છલાંગ લગાવીને તેઓ ટોચ પર પહોંચ્યા છે. બીજી તરફ, ભારતના જસપ્રીત બુમરાહ (Jasprit Bumrah) ફેબ્રુઆરી 2024 થી લગભગ 2 વર્ષ સુધી મોટાભાગે નંબર 1 ના સ્થાન પર રહ્યા હતા, પરંતુ શ્રીલંકા સામેની વર્લ્ડ ટેસ્ટ ચેમ્પિયનશિપ શ્રેણીમાં ન રમવાના કારણે અને સ્ટાર્કના દમદાર ફોર્મના લીધે તેઓ હવે બીજા સ્થાને આવી ગયા છે. આ સાથે જ ન્યુઝીલેન્ડના મેટ હેનરી (Matt Henry) પણ એક સ્થાન નીચે ઉતરીને ત્રીજા સ્થાને પહોંચી ગયા છે.
ટેસ્ટ બોલિંગ રેન્કિંગમાં કમિન્સ અને લિયોનને થયો ફાયદો
'મનીષ સિસોદિયા પર કોઈ આરોપ નથી લગાવ્યાં..' કોર્ટમાં CBIના દાવા સામે કેજરીવાલનો ઘટસ્ફોટ
ઓસ્ટ્રેલિયન ટીમના કેપ્ટન પેટ કમિન્સ (Pat Cummins) બાંગ્લાદેશ સામે 6 વિકેટ ઝડપીને એક સ્થાનના ફાયદા સાથે ચોથા નંબર પર પહોંચી ગયા છે. આ ઉપરાંત, અનુભવી સ્પિનર નાથન લિયોન (Nathan Lyon) ને પણ 2 સ્થાનનો લાભ થયો છે અને તેઓ હવે ફરીથી ટોપ 10 બોલરોમાં સામેલ થઈ ગયા છે.
પાકિસ્તાન સામે ઇંગ્લેન્ડના બોલરોની લાંબી છલાંગ
પાકિસ્તાન સામે રમાયેલી ટેસ્ટ મેચમાં ઇંગ્લેન્ડ તરફથી ઓલી રોબિન્સન (Ollie Robinson) અને જોશ ટંગ (Josh Tongue) ની જોડીએ મળીને 16 વિકેટ ઝડપી હતી. આ જબરદસ્ત પ્રદર્શનના દમ પર રોબિન્સન 15 સ્થાન આગળ વધીને 11માં નંબર પર આવી ગયા છે, જ્યારે ટંગે 16 સ્થાનની છલાંગ લગાવીને 17મું સ્થાન હાંસલ કરી લીધું છે.
Comments
Loading comments...